6. ปาราปริยตฺเถรคาถา
[116]
‘‘ฉผสฺสายตเน หิตฺวา, คุตฺตทฺวาโร สุสํวุโต;
อฆมูลํ วมิตฺวาน, ปตฺโต เม อาสวกฺขโย’’ติฯ
… ปาราปริโย [ปาราสริโย (สี.), ปารํปริโย (ก.)] เถโร …ฯ
7. ยสตฺเถรคาถา
[117]
‘‘สุวิลิตฺโต สุวสโน,สพฺพาภรณภูสิโต;
ติสฺโส วิชฺชา อชฺฌคมิํ, กตํ พุทฺธสฺส สาสน’’นฺติฯ
… ยโส เถโร…ฯ
8. กิมิลตฺเถรคาถา
[118]
‘‘อภิสตฺโตว นิปตติ, วโย รูปํ อญฺญมิว ตเถว สนฺตํ;
ตสฺเสว สโต อวิปฺปวสโต, อญฺญสฺเสว สรามิ อตฺตาน’’นฺติฯ
… กิมิโล [กิมฺพิโล (สี. สฺยา.)] เถโร…ฯ
9. วชฺชิปุตฺตตฺเถรคาถา
[119]
‘‘รุกฺขมูลคหนํ ปสกฺกิย, นิพฺพานํ หทยสฺมิํ โอปิย;
ฌาย โคตม มา จ ปมาโท, กิํ เต พิฬิพิฬิกา กริสฺสตี’’ติฯ
… วชฺชิปุตฺโต เถโร…ฯ
10. อิสิทตฺตตฺเถรคาถา
[120]
‘‘ปญฺจกฺขนฺธา ปริญฺญาตา, ติฏฺฐนฺติ ฉินฺนมูลกา;
ทุกฺขกฺขโย อนุปฺปตฺโต,ปตฺโต เม อาสวกฺขโย’’ติฯ
… อิสิทตฺโต เถโร…ฯ
วคฺโค ทฺวาทสโม นิฏฺฐิโตฯ
ตสฺสุทฺทานํ –
เชนฺโต จ วจฺฉโคตฺโต จ, วจฺโฉ จ วนสวฺหโย;
อธิมุตฺโต มหานาโม, ปาราปริโย ยโสปิ จ;
กิมิโล วชฺชิปุตฺโต จ, อิสิทตฺโต มหายโสติฯ
เอกกนิปาโต นิฏฺฐิโตฯ
ตตฺรุทฺทานํ –
วีสุตฺตรสตํ เถรา, กตกิจฺจา อนาสวา;
เอกเกว นิปาตมฺหิ, สุสงฺคีตา มเหสิภีติฯ
2. ทุกนิปาโต
1. ปฐมวคฺโค